مرت ايام الامتحانات بسرعه وماحسوا فيها .. وطبعا ريم حظيت بالنصيب الاكبرمن الراحه واكثر انسانه
استمتعت فيها وانبسطت وطنشت ابو الدراسه وأم الكتب .. ومافكرت تفتحها الا قبل بدايه الامتحانات بيوم
بيوم السبت باول ايام الامتحانات النهائيه ..أجواء مكهربه ومصحوبه بشوي من الخوف للبعض ..
وللبعض الآخر تبلد احساس وعدم احساس بقيمه الموقف اللي يعيشونه .. هناك بالمدرسه .. وعينك ماتشوف
البنات .. اللي تشوفونها ملزقه وجهها بالكتاب وماتبي تفوت عليها ثانيه حتى مايضيع عليها حرف وماتشوفها الا
الشعر مزيت والشكل مبهذل ومي رايقه لشيئ والاخلاق معها قافله وماتكلم احد وهاذي من عندي تأكدوا انها
ناجحه مع مرتبه الشرف
اماعن الفئه الثانيه االاوهي اللي تجيك كاشخه على 24 وجايبه طبلونها بحركات الشعر والاكسسوارات والحاله
أما عن الكتاب فحدث ولاحرج .. تلقاها تاركه الكتاب بجنبها ومسكر ..مخليته جنبها بس عشان تحس انها عندها
امتحان اليوم ..وطبعا ميه بالميه اظمن لكم ان هاللي قاعده اتكلم لكم عنهم مصيرهم بيت اهاليهم .. يناديهم ..
اللي هم من شروى ريم الفالحه وشلتها ..
التموا الشله على بعض و قعدوا يسلمون ويسولفون على على بعض وكأن لهن سنين ماشافن بعضهم البعض
مو اسبوعين .. وكملوها هاتك ياسواليف وحش بخلق الله ومطنشات الكتب ..
كل البنات كانن يسولغن مع بعض بأستثناء ريم ورنا ..
ريم اللي كانت واصله حدها من الموقف اللي تعتبره بايخ من رنا ..
رنا تحاول تكلم ريم :
رنا : ريم ..
ريم ماردت وكنها ماسمعت ..
رنا مصره : ريييييييييييم بلاسخافه اكلمك ..
ريم : مطنشه : ايوا يانجلا وش كنا نقول
رنا : ريم ووجعه ردي عاااااااد
ريم : اففففففففففففف .. نور نور .. اصبري بقوم معك اتمشى ..وقامت وطنشت رنا ..
مرت الدقايق بسرعه .. وبعدها الكل تجهز وبدت التحضيرات للدخول لقاعه الامتحانات
الكل كان متوجه لفصله .. وهناك عاد تشوف البنات .. اللي تشوفونها خايفه وتنتفض وتقرى الاذكار مرعوبه ..
واللي مو هامها والوضع عندها طبيعي .. وكل قاعه تشوفنها تصدح بأصوت البنات وكل وحده تلقاها تسأل
زميلتها عن السؤال الفلاني .. مع انها من خمس دقايق مذاكرته بس من الخرعه تلقاه طار ..
لحضات ..وبدت تدريجيا تهدى المدرسه قاعه قاعه ويعم الصمت .. وتتوزع الاوراق وتشتغل افكار البنات ..
.. مر اول يوم كأي يوم روتيني بطبيعه الامتحانات .. البنات يحلن .. وبعدين يوقعن وبعدها يتسهلن على برا
القاعه ..ريم طلعت من الامتحان واخلاقها قافله مو عشانها ماحلت زين لااا عشان ابغض واصيع شله
تشوفها على وجه الارض معها بالقاعه ..
رنا لمحت ريم من بعيد وصارت تناديها : ريم .. ريم .. ريوووووم اصبري
ريم تمشي ومطنشه مع انه تسمع صوت رنا يناديها
رنا : وقفت عند ريم .. ويالله تآخذ نفس .. وجع ماتسمعين لي ساعه انادي ؟؟
ريم بدون نفس : هاه .. خير وشتبين .انتي الثانيه بعد ..
رنا : سم الله علي شوي شوي ..
ريم اخلصي ..
رنا : أي شلون امتحانك .؟
ريم .. والله معفن مثل وجهك ..
رنا تعاند : دامه مثل وجهي .. اجل اكيد ناجحه فيه
ريم : رنا .. يارنا .. تعرفين الله لايهينك تهويني شوي ..ترى الانبير عندي متعدي العداد
منك
رنا ضحكت : خلاااااااص عاد ماصارت ذليتيني بذيك السالفه .. انسي يابنت الحلال انسي ..
اقولك .. واخوووي عمره وعساه ما اعرس .. بس انتي خلاص لاتدققين بالموضوع كثير
ريم سكتت ..
رنا : هاااه بشري رضيتي ياعمتي ..
ريم ابتسمت .. وكاها رضت .. لابقى شوي ..
رنااا : ياليل .. ومتى ناوي يطيح
ريم ضحكت .. لاخلاص ابشرك طاحح
رنا : أي كذا اضحكي .. ياشينك لاقلبت خلوقك .. ويابغضي لك
ريم ضحكت : ترى اهوووون وارجع لزعلي
رنا ضربتها على خفيف : يالله عاد .. اعطيتك وجه .. وضحكوا وكملوااا طريقهم للبنات
.. مرت ايام الامتحانات تجري مانها البرق .. وكل يوم من هالليالي كان له طعم ثاني لريم وشلتها ..
يوم بيوم كانوا يستمتعون بكل لحضه كانوا يقضونها مع بعض بكل تفاصيلها ..
بداا العد التنازلي .. وهذا هو آخر يووم لهم بها المدرسه .. اليوم بيودعون
آخر سنه من مرحله الثانويه وبيتخرجوون .. اليوم بيودعوون عالم المدارس .. والدفاتر والكتب
ومعهم بيودعوون كلمه ابلاا .. وبيتبنون بعدها كلمه الدكتور والاستاذ ؟؟..!!
كل وحده منهم من هاللحضه راح تششق طريقها لحالها .. مع مستقبل مجهول .. وبصيص امل
لحياه احلى لبكـرا .؟!..
آخر يوم كان محزن لبعض البنات .. اللي صارن يبكن .. من الالم وكلن على حسب اما على فراق صديقتها ..
واللي تبكي على فراق حبيبتها .. واللي على فراق مدرستها .. كل هالنوعيه كانت عكس شلة المرح
شله ريم بلعكس كانن يضحكن ويعلقن على اشكال البنات اللي يبكن .. كلهن ماكان ودهن يضيعن
ولالحضه من وجودهن مع بعض .. صحيح اليوم يمكن يكون أخر يوم يشوفن فيهـا بعضهن البعض
لأن كل وحده لها ظروفها وحياتها الخاصه اللي تمنعها من زياره الثانيه
ريم .. مع بنات شلتهـا بعد ماخلصوا من التعليق على امه لا اله الا الله .. خذن روحهن وصارن
يدورن بانحاء المدرسه .. ويتنقلن مابين الفصووول .. ويتسرجعن ذكرياتهن مع بعض .. ويتذوقن طعمهـا
وكأنهم بها اللحضه عاشو فيهـا .. مشى الوقت .. وكملوا يتنقلون ويتأملون بجدران هالمدرسه .. وعند كل جدار
قاموا يتذكرون كل ذكرى كتبوهـا مع بعض بالزاويه الفلانيه ..وبالجدار الفلاني ..كل حدث كان يصير معهن من
مواقف الاكشن المخيف والمغامرات الحلوه ..يدوننه بالمكان اللي صار فيه .. وتحديدا على الجدار
.. خذتهم الذكريات لعالم ثاني .. .. ووجيههم صارت مابين حلاوه الذكرى ومراره الفرقى ..
آخر الثواني قربت على الوداع .. وكل وحده بدت تنسحب وتمشي وبالنهايه كل منهم لبست عباتها وعند السلام
ماقدروا يسكتون .. وقلوبها دمووع عند النهايه
..ريم :كان داخلها شيئ يتقطع من الحزن .. وبما ان طبيعتها تكره احد يشوف دموعها .. .. عجزت .. صارت
تمثل دور الجبل اللي مو هامه .. لاكن مع هذا ملامحها فضحتهـا .. ولمعه الدمعه بعينهـا بانتـ غضب ..
وأفترقووووووووووووا
بكذا انتهت أخر سسنه من حياتهم كطلاب مدارس .. والكل بقى ينتظر شهادته بعد أيام .. طلعت النتايج ..نسبهم
ريم كانت ..(87),ورنـا 80 .. اما عن بقيه الشله .. فمحد صعد أكثر من ذلك .. كلهم بحدوود الثمانين
أبتدت الأجازه .. وبدت الراحه ..وبدى الطفش معها .. مو عشانها ممله .. لااا .. عشانها فارغه وخاليه من أي
حياة للبعض .. بعد اسبوعين من الاجازه .. بالليل ريم كانت ضايقه فيها الوسيعه .. وواصله حدها من الطفش
. قامت تتسدح على الكنب .. ومن ثم تقوم وتقعد على حيلها ..شوي تطقطق بجوالها وشوي بالقنوات ..
ريم تحاكي امها .. اففففففففف .. يمه طفش .. والله طفش مليت طقت كبدي .. سهر ونوم وآكل .. ومقابل تلفزيون
يمه حرام عليكم طفشت ..
أمها عقب ماكانت مشغوله بقرايه كتاب .. سمعت بنتها ثم ردت .. : احمدي
ربك على الصحه والعافيه .... وبعدين مي هاذي الاجازه اللي تتمنينها يالله خووذي ..
ريم : الحمد لله على العافيه ماقلنا شيئ .. .. بس ياناس ياعالم مليت من مقابل الجدران بالبيت ؟ابي اطلع مثل
الخلق ..ابي اتمشى .. مي حاله هاذي
أمها : من يبي يتمشى بك .. وليد يابعد عيني هو .. للحين بجده مارجع .. وياسر ماينشاف يطلع المغرب وايجي
الا الظهر .. ينام .. وبعده يقوم المغرب وهاذي عيشته .. . وبدر اخوكي ماغير متنقع بها الحواري يلعب كوره ..
حتى قلب لونه كحلي من الشماس .. يجي وينام وهاذي حالته ..
خلصوا اخوانك من بعد .!
ريم هنا خارت قواها مالها حيله غير تبلع لسانها وتسمت .. ريم أففففففففففف وقامت ..
أمها على وين : ريم لجهنم الحمراء .. ابنتحر ..
أمها تمازحها وتجاريها : تعالي شوفي التلفزيون ابرك لك من الانتحار ..
ريم وقفت والتفتت على امها : طلع من خشمي هالتلفزيون مافي فلم او مسلسل جاء برمضان او شعبان
الا شفته .. حتى عيوني شوفيها أذووت ..
أقول اروح اطس لملاذي غرفتي أنام أبرك لي ..
راحت ريم بملل لغرفتهـا بخطوات يالله تشيل روحهـا من الارض ..
دخلت ورمت روحها على السرير متملله ..
حياه فارغه .. مليانه ملل .. مافيها شيئ .. ومي قادره تصنع بحياها شيئ جديد ..
أمنياتها كثير بس محد قاعد يسمع .. ولايعطيها وجه ..
قطع عليهـا صوت جوالها بنغمه مميزه خاصه فيها ..
ضغطت ريم الز الأخضر .. بدون أهتمام .. حتى بدون ماتشوف الرقم .؟!
المتصل : بصوت رجالي غليظ ....,’ مساء الخير ..؟!
ريم اول ماسمعت الصوت انصدمت .. ورجعت شافت الأسم .. لقت الرقم غريب ؟!
؟.؟.؟.ريم بأندفاع .. خير أن شاء الله وشتبي ..
المتصل : قلنا مساء الخير ..طيب ..
ريم ... الله لااااااايمسيك بالخير ..
المتصل : دامك ماتبيني اكلمك ليش راده على الرقم طيب ؟!ولاحركات بنات يعني وتتغلين ..
ريم : كذااا مزاج .. جوال وجوالي .. احد لامه دخل بها الشيئ ..
وبعدين دامك غلطت ودقيت اول مره لاعاد تعيدها .. حتى ماتقرد نفسك بنفسك .. ..
رنا عجزت تكمل تمثيل وضكت ههههههههههههههههههههههههه
ريم وكأن هالضحكه ماره عليها من ؟!
رنا أشوى مثل ماخبرتك دفشه وعربجيه مع الرجال ماتغيرتي ..
ريم رفعت حاجبها .. وقالت مصدومه رناااا !!
رنا : بشحمها ولحمها
ريم وجع سخيففففففففه .. انتي وحركاتكـ يقال يعني تبي تسوين مقلب ..
لاكن تدرين والله واضح اسلوب البنت .. العيال مو كذا
رنا تكلمت الخبيره .. يالله تكلمي يافيلسوفه زمانكـ شلون العيال يتكلمون
قامت ريم تغلظ صوتها : وتميله على نعومه ساحره .. مثل الشباب الغزلنجيه
مساء الورد .. على الناس الورد .. مين الحلوو اللي معنـا .. يعجبني الثقل
الخفيف .. امووت انا ياهوه خفي على قلبي ياقمر
رنا ههههههههههههه اقول الله يخلف على امن جابتك
ريم بالله شلون ماانفع ولد ..
رنا :ومين قالك اللحين أنك بنت .. قسم اشك بانوثتك
ريم تضحك : وجع وش قالولكـ .. بس تدرين .. والله خساره توقعتكـ حبيبي .. فرحت
رنا مصدومه : وشووووووووووو .. أي حبيب ؟!
ريم ضحكت: ليه ماقلت لك عنه .. هذا الله يسلمك انسان رومانسي شفاف
طايح لي رسايل غرم وحب .. وانتظار ..
رنا ماالت مو فاهمه ؟!لكـ انتي يرسل ؟!
ريم : لالبنت الجيران .. وشرايكـ .. اصبري خلي اكملك بقيه القصه ..
هذا طول الله عمرك واحد .. له فتره طويله يرسل رسايل كل وحده احلى من الثانيه ..
ومن رقم مجهوول مااعرفه .. شكله والله اعلم مخربط بالرقم .. ويحسبني حبيبته الجفول
رنا : أخاف يكون فهد ياريم ؟1
ريم : لاااااامستحيل .. فهد مايرسل لي الا من رقمه .. وأذا رجع وأرسل لي رساله من جوال جديد
يكتب لي اسمه بنهايه الرساله .. حتى ادري انها منه .. وبعدين هذاك الولد مجنون
وماعنده احساس مو زي اللي قاعد يرسل .. ياحبي له
رنا : وجع ريمووه اعقلي لايكون تتهورين ويميل قلبك له وتحبينه
ريم تمزح : هالسالفه حبيته وخلصت السالفه .. مو مشوين قاعده أقولك ياليتك هو اللي داق
كان طقيتها معه سواليف
رنا عصبت : ريم جد اتكلم اعقلي وش اللي قاعده تقولينه .. مي هاذي عوايدنا ولاطبايعنا
ريم هنا ضحكت بصوت اعلى : ههههههههههههههههه يابنت بلاجنون أنتي الثانيه .
خير ان شاء الله تدرين اني مو راعيه هالسوالف الله يخلف .. وبعدين عشان اطمنك
اتوقع لوهو يكلم ويبي يسمع صوتي سكر السماعه بوجهي ..
رنا : طيب بس المهم اللحين اذا رجع ارسل قولي له تراك ملخبط بالرقم .. وشكلك غلطان
ريم : والله كنت بسويها وبعدين هونت .. يختي رسايله شيئ .. راقت لي .. على الاقل استفيد
منها وآخذها ..
رنا : ريموووووووووووووووووووووووه
ريم ههههههههههههه خلاص خلاص اقوله انشاء الله انتي تآمرين ..
رنا : الاصحيح ماسألتيني عن الرقم اللي داقه منه عليك
ريم : أي صح مار ..مين رقمه ؟
رنا : باركي لي طلعت رقم جديد ..
ريم : ماشاء الله مبررووووووك يالله تفصلينه بالعافيه
رنا : يختي قلب كبدي الرقم القديم ازعاجات ووجع راس قمت وش قلت ..
يابنت طلعي رقم ردميه .. اللي يقراه تنسد نفسه ويهون مايدق
ريم هههههههههههههههه خبله
رنا : المهم .. شلونك شلون العلطه معك ..
ريم : آآآآآآخ يارنا وش اقول وش اخلي طفش قسم بالله طفش
حالتي حاله الله لايوريكي ..
رنا حالتك مي بزين من حالتي لاتشكين لي أبكي لك .. بقولك وش صار معي اليوم
تخيلي العصر قفلت معي من الطفش قمت ازن فوق راس امي ابيها تطلع معي .. وامي لاحياه لمن تنادي
المهم حاولت فيها ابقنعها اطلع بروحي .. مع الشد والاخذ رضت وقالت روحي مع السواق .. وخوذي اغراضك
من السوق وأرجعي على طول
انا طاااار عقلي .. وحطيت رجلي لغرفتي من الوناسه بجيب عباتي خلاص وبطلع .. نزلتـ .. وكنت بروح أطلعع
.. قمت تذكرت شيئ .. وقلت اروح اسال امي اذا تبي شيئ من السوق
.. ومن سوووووووء الحظ
أخوي المسعد سلطان موجود وشافني
اول ماشافني لابسه العباة عقد حواجبه ..وسألني وين رايحه ... عاد هو أكره مايشوف بالدنيا بنت تطلع مع
السواق ولحالها
مابالك اخته .. انا بلمت وسكتت وانخرست مدري وش اقول مدري وش ادبر كذبه .. مالقيت نفسي الا امي تقوله
انها تبي تروح للسوق مع السواق ..
أنااااااا هنا تشهدت على روحي قبل لا انذبح على يدينه .. ومتقبله أي شيئ يجيني منه ..
كل الهدوء اللي كان بوجهه اندثر وتبدلت ملامحه وصار يخانق ويهزء ويعطيني محاظره بالاخلاق
ون البنت العاقله تخاف على روحها وماتروح مع السواق لحالها وبسوووق بعيد ماتدري وش يصير لها
ومايصير لها .. ونا ساكته وبالعه لساني مارديت بحرف وانكسر خاطري .. قمت على طول اخترمت نفسي
ومشيت ابي اصعد .. عاد هو بعدها رحمني .. يوم شافني انكسر خاطري ناداني ووداني للسوق من سوووء الحظ
وتعالي شوفي عاد .. شوي سكري نقابك .. شوي .. المحل هذا لاتدخلينه فيه شباب ..
.
وانااا شوي ويشيب راسي .. أقولك قسم مادخلت الاثلاث محلات وطلع روحي .. مابالك لو ادور السوق كله
كان يجلطني .. على طول رجعت للبيت ولعنت الساعه اللي فكرت فيها اروح للسوق معه ..
ريم : احسن مزدي فيك خليه يدق فرتك ..
رنا : وجع يالسخيفه انا صديقتك
ريم : ًأصصص ولاكلمه .. والله انه صادق .. اجل تبين تروحين مع السواق لحالك .. منتي صاحيه ..
رنا قامت تمزح وتدق ريم من جديد : أقول قسم بالله انك تصلحين له .. ريم ياحيي وافقي ..
ريم انحرجت لما حست رنا فهمتها غلط وهي تدافع عنه : وقامت تبي تسكر السالفه .. وتضيعها
أقول رنا ماودك تطبقين السماعه وتتسهلين عند أمك توسعين صدرها ..
رنا حست بردت فعل ريم : وأبتسمت .. ريووم دعابه دعابه .. عادي ..
ريم : أقول هي ياهانم تراني انسانه تبي تتروش .. ونتي معطلتني .. فلو عندك ذرة كرامه قفلي ..
رنا تعاند : ماراح أقفل ..
ريم : أحسن بعد لاتقفلين .. انا بقفل .. وقفلت السماعه بوجهها
ريم قفلت من هنـا .. ورنا قامت تضحك من من هنا .. تستانس على خبال رفيقه عمرها وبحياتها مازعلت من
أو حتى خذت بخاطرها منها ..
رنا كانت بالصاله تكلم .. ودخلت عليها امها .. وشافت رنا بنتها تضحك ..
امها : سلامات وشفيكي ؟!
رنا ومازالت على ابتسامتها : لابس قاعده اكلم صديقتي الخبله ..
امها : أي وحده فيهم : مو انتي الله يصلحك مخاويه بنات غاسلات عقولهن وعايشات ..
رنا ضحكت : هاذي ريم يمه .. اللي ابيها لسلطان ..
أمها : يوم سمعت طاريها أبتسمت ..وتذكرت شيئ .. ياحبي لها .. من كم يوم دقت على جوالك ..
وجوالك كان عندي بالصاله ونتي مو عنده .. قمت رديت عليهـا .. والبنت راح صوتهـا يوم درت أني امك ..
رنا : تدرين عاد هي من النوع الخجوول جدااا .. بس شكلها انحرجت عشانك خاطبتها لولدك ..
خصوصا ان هذاك الموضوع صايره تتحسس منه ..
امها : سكتت .. والله اخوكي .. يوم عن يوم .. يذبحني همه اكثر واكثر ..
رنا : الاصحيح يمه .. قلتي لخالد عن رفض ريم !!
أمها بضيقه : لاوالله يايمه ماقلت له .. حتى هو ماسأل ..حتى انا يوم امه قالت لي عن رفضهـا
ماسكتت .. أصريت وقلت اننا نبيها وشارينها .. وانا عن نفسي ابي اعتبر روحي ماسمعت ردهـا ..
وكل الوقتـ قدامها عشان تفكر حتى لو تطول علينا شوي ..
المهم اني طلبت من امها تحاول فيها
رنا : أسكتي يايمه .. ياني نشبت لها نشبه الا ابيها توافق .. قولك بكل سالفه اقولها ادخل سلطان فيها
بنت اللذين ياقساوة راسها عجزت لها أقولك جننتها من كثر مااتكلم لها عنه .. شوي أتكلم لها عن رجولته ..
وشوي عن جماله .. وشوي عن أخلاقه ..ومواقفه .. اخبرها صديقتي تحبـ المراجل .. وتحبـ الرجال الجديين
تدرين يمه عاد .. أيام قبل .. كنا نسولف وكل وحد مننا توصف فتى احلامها ..
كلنا كان له كريزما معينه بالشخصيه اللي نبيها .. الاهي ..
كانت توصف واحد مثل شخصيه سلطان بكل شيئ ..
يعني لوتزوجته تحت ظغط مني على الاقل ماراح احس بالذنب بها الشيئ
سلطـان كـان توه داخل البيت كالعاده وساري .. دخل وسمع أسمه ..
سلطان بعد ماوصل لعند امه واخته الموجودات بالصاله ..
سلطان : .. وشفي سلطان بعد ؟!
رنا : أرتبكت وخصوصا انها مرتفع ظغطها منه على اللي سواه بها اليوم بالسوق ..
أم سلطان : هلا وغلا والله ..
سلطان ابتسم لامه بحنيه : هلابك زود .. وش فيكم اجل ؟!
أمهم كلمت رنا :رنا قومي حطي لأخوكي العشاء ابيه بسالفه !
رنا ماكان ودها تقول امها لسلطان عن رفض ريم .. على الاقل مو اللحين ..
قامت رنا .. وسلطان ظل صامت محترم سكوت امه ومنتظرها تتكلم .
أم سلطان : بعد صمت .. قالت .. يايمه انت تعرف المقسوم والنصيب .. و أن النصيب مثل الموت
ماتدري هو لك متى .. أووين ؟! ..
سلطان وكأنه فهم مغزى امه بالكلام ..
أمه : يايمه البنت اللي خطبتها لكـ .. ماوافقت .. سبحان ربي .. موكاتبها لكـ ..
والله يعوضكـ بغيرهـا يمه ..
سلطان كان ساكن وهادي .. اول ماسمع اللي قالته امه .. ثارت داخله شعله غضب .. رغم صغرها ماعرف
سببها ..\حس بالغيض من هالانسانه اللي رفضته .. ..أستغرب من هالشعور اللي بدا يضايقه وعجز يفسر سببه
... حس ان يمكن هالشعور يكون نتيجه رفض اول بنت يخطبها بحياته .. تعودأ ي بنت يخطبها .. اهلها يوافقون
حتى بدون مايفكرون .. اغتاظ من الداخل على هالانسانه اللي اسمها ريم .. يمكن عشانها الوحيده اللي قدرت
ترفضه .. وتكسر غروره ..
لا اردايا بانت على سلطان ملامح الضيقه اللي ماقدر يخفيها .. ولاكن علت عليها ملامح الشموخ الموجوده
داخله ..
سلطان برويه : سأل مستفسر : ليش يايمه ..أحد يبيها غيري .!
امه : لاوالله يايمه .. أمها ماذكرت هالشيئ .. الشيئ الوحيد اللي قالته أن البنت ماتبي تعرس
لأنهاتوها صغيره على الزواج .. وغير ذلكـ ان الولد أكبر منها ب12 سنه .. مع ان اهلها موافقين وماعندهم مانع
.. بس هي ..ماتبي
سلطان كان صامت .. ماعلق ولارد . لاكن حس ان هالكلمه جرحته .. لما قالت انه اكبر منهاب12 سنه
وقف سلطان على حيله .. وقال لأمه : محد داري عن الخيره .. الله يوفقها ويسعدها ..
امه على وين قمت ؟!
سلطان بروح أنام .. عندي شغل لفوق راسي بكرا ..
أمه والعشاء ..
سلطان : تعشيت قبل مااجي .. يالله عن أذنك .. وتصبحين على خير .. وراح تركهـــــا
رنا اول ماسمعت خطوت سلطان على الدرج .. ركضت لعند امها
رنا : يمه وش قال ؟!
أمها : بضيقه على حال ولدها .: ضاق صدره ياعساني ماأبكيه .. لاكن عهد ووعدن علي ..
ويحرم علي ..أفتح هالطاري معه .. دامه هو نفسه مافتحه .. وأذا يبي يقضي طول عمره كذا هو حر .. وهو
ادرى بمصلحته ..
رنا : يعني شلوون خلااااص
أمها بحزم : خلاص وسكري هالسيره ..
رنا بخيبه امل : يعني خلاص مو مآخذ ريم ..
أمها : لاريم ولاغيرها قلت لك سكري السالفه نهائيا ولاتفتحينها الا اذا هو بنفسه فتحها
/
/
/
وبالأخيــــر يبقى السؤال .,’
أيش النهـايه اللي تنتظر ريم مع مصيرهـا المجهول !..؟
وهل راح ينتهي ويختفي شبح فهـد من حياتهـا ويزول مع رفضها له .,.؟!
صاحب الرسايل .,’ وش يبي من ريم ؟! وهل يعقل أنه بالفعل غلطان ؟!
سلطـــــان .,’ هل ياترى يبي ينسى ويطلع ريم من راسه مثل ماطلع عشرات البنات غيرها ؟!
/
/
كل هالملامح راح يكشف النقاب عنهـا بالأجزاء الجايه أكيد .. خليكم قريب مني ..